Tradita zakonore e dasmës në qytetin e Elbasanit

Abstrakti

Thirrjet për në dasëm, në kohët e shkuara, bëheshin brenda Kalasë me anën e një gruaje që ishte shërbëtore në atë familje që bënte dasmën. Ajo shkonte nëpër të gjitha shtëpitë, duke e bërë atë thirrje me fytyrë të zbuluar, pa napë e ferexhe. Kjo grua quhej “ftuese” dhe shkonte në çdo shtëpi ku kishte porositë, hynte deri në oborr a në çardhak dhe u thoshte grave të asaj shtëpie të urdhëronin e të vinin familjarisht tek X-i, duke u hedhur një kokërr sheqeri përdhe. Përgjigjja që i kthehej ishte: “U trashëgofshi e u plakshi!”. Ajo familje e dinte që ishte e thirrur për darkë në shtëpinë e dhëndrrit, ku shkonte vetëm një burrë e një grua, pa marrë fëmijë nga pas.