Etnografia e të folurit për lidhjen e fejesës në traditën shqiptare: formulësimet, urimet, përshëndetjet

Abstrakti

Etnografia e të folurit është një këndvështrim interesant i shprehjeve, të paraqitura si standard gjuhësor, me ngarkesë domethënëse emocionale linguistike, të përdorura në momente të caktuara, përfshirë edhe jetën rituale. Ajo shqyrton e hulumton në aspektin sociolinguistik shprehje e mënyra të thëni, të cilat kanë një bosht të caktuar etnografik dhe paraqesin interes për larminë e variacioneve gjuhësore të shpalosura tradicionalisht në këto ceremoni. Këtë synon edhe materiali i paraqitur në këtë studim lidhur me etnografinë e të folurit në traditën gojore shqiptare gjatë lidhjes së fejesës, duke u përqendruar në fjalët e urta, urimet, përshëndetjet, formulësimet e gatshme, të kthyera në rutinë zakonore dhe domosdoshmëri të natyrshme shoqëruese. Studimi ndalet edhe në ciklin e këngëve të fejesës, të cilat aplikohen të lidhura ngushtë me zakonet që kanë të bëjnë me momentin e dhënies së fjalës, me shenjat e fejesës, me mënyrat e njohura të të shprehurit në ceremoninë përkatëse dhe dhuratat e bëra me këtë rast.