Gjurmimi i dokumenteve me rëndësi historike kombëtare si domosdoshmëri për pasurimin e fondit arkivor kombëtar

Abstrakti

Rrugëtimi i shtet formimit të shtetit Shqiptar ka qenë i gjatë, dhe i mundimshëm. Pjesë e këtij rrugëtimi kanë qenë personalitete dhe familje të shquara shqiptare, të cilët me punën dhe luftën e tyre bënë të mundur që Shqipëria të bëhej një shtet sovran dhe i pavarur në ekzistencën e vet shekullore. Ngjarjet e këtij rrugëtimi të gjatë nëpër dekada e shekuj në episode të ndryshme janë dokumentuar nëpër dhjetra e qindra dokumente, si dëshmi e sakrificës së një populli, vlerat e të cilit janë shquar në shumë dimensione. Një pjesë e këtyre dokumenteve, sot, ndodhen në administrim të trashëgimtarëve të këtyre personaliteteve apo familjeve të shquara, brenda dhe jashtë vendit tonë, si një trofe të përpjekjeve të lavdishme të paraardhësve të tyre. Duke qenë se këto dokumente rrezikojnë ekzistencën e tyre duke u ruajtur nëpër ambiente të cilat nuk kanë dhe nuk plotësojnë kushtet e kërkuara teknike dhe shkencore, Drejtoria e Përgjithshme e Arkivave si një institucion i specializuar për rujtjen, administrimin dhe shërbimin e dokumenteve, ka ndërmarr një nismë për gjurmimin dhe evidentimin e tyre, për ti bërë ato pjesë të fondit arkivor kombëtar. Në këtë mënyrë garantohet jetëgjatësia e tyre por njëkohësisht, vlerat dhe rëndësinë që ato mbartin i vendosim në shërbim të historianëve, studiuesve apo çdo individi i cili dëshiron të mësojë dhe kuptojë dimensionet e ngjarjeve të shkuara. Ky punim i paraqitur në Konferencën e VII Mbarëkombëtare të Arkivistikës, do të sjell një infrastrukturë totale metodologjike si një dokument të ideuar dhe miratuar nga DPA, për gjurmimin dhe evidentimin e dokumenteve me Rëndësi Historike Kombëtare, që ndodhen jashtë Fondit Arkivor Kombëtar.