Kontributi i Gjeçovit në fushën e botimeve, të arkeologjisë e historisë

Abstrakti

Nga gjithçka e paraqitur në këtë punim modest, të bie në sy jo vetëm pasuria e materialit që paraqet veprimtarinë e larmishme fetare, arsimore e shkencore të Gjeçovit, por edhe kujdesi i jashëzakonshëm prej arkivisti që tregonte për ruajtjen e dokumenteve, të shënimeve që mbante, të letërkëmbimeve etj. Lidhur me këtë, ai pohon se ‘’Çdo gjë e ruaj në arkivin privat temin’’, Shtjefen Gjeçovi nuk u mjaftua me punën që bënte vetë në këtë drejtim. Duke qënë i ndërgjegjshëm se historia e popullit shqiptar mund të shkruhej saktë shkencërisht vetëm duke u mbështetur në burime arkivore, ai është shprehur në disa nga shkrimet e tij mbi nevojën e domosdoshme për krijimin e një arkivi historik kombëtar, si dhe të një muzeu arkeologjik, në mungesë të tyre ai e ruajti me fanatizëm në arkivin e tij çdo gjë që shërbente për ndriçimin e historisë së shqiptarëve, si përmes dokumenteve të shkruara ashtu dhe të objekteve arkeologjike apo të tjera që zbuloi si studiues e gjurmues i zellshëm. Fondi i Shtjefen Gjeçovit mban Nr. 58, ka një pasuri me vlerë të madhe kombëtare në fusha të ndryshme, si studiues i shquar i kulturës popullore, përkthyes, në fushën e arkeologjisë, historisë, krijimtarisë letrare dhe atë të etnografisë etj. Materialet e këtij fondi kanë këto kufij kohore, vitet 1864-1942 dhe pa vit.