Praktikat e mësimdhënësve të arsimit fillor në përgatitjen e materialeve mësimore

Abstract

Ky raport studimi përmban të dhëna lidhur me përgatitjen e materialeve mësimore në klasë, të cilat mbështesin mësimdhënien. Pjesa e parë e raportit përmban analizën teorike të dokumentacioneve zyrtare, si ligjit, kurrikulës bërthamë, kurrikulave lëndore, dhe studime të autorëve të ndryshëm lidhur me rolin dhe rëndësinë e materialeve mësimore në procesin mësimor, ndërsa në pjesën e dytë paraqesim perceptimet e nxënësve dhe mësimdhënësve të arsimit fillor, opinionet e tyre, lidhur me përgatitjen e materialeve mësimore për të mbështetur mësimdhënien dhe nxënien. Qëllimi i studimit është të paraqesim praktikat e mësimdhënësve në përgatitjen e materialeve mësimore, mundësitë dhe sfidat e tyre, si dhe të identifikojmë nivelin e përfshirjes së nxënësve në përgatitjen e materialeve mësimore. Për realizimin e këtij studimi, ishte e nevojshme të hartohej një pyetësor për të mbledhur të dhëna nga mësimdhënësit në shërbim. Pjesëmarrës në studim janë 380 mësimdhënës të arsimit fillor. Për mbledhjen e të dhënave nga nxënësit realizuam intervista me 17 nxënës, ndërsa për evidentimin e të dhënave nga intervista krijuam instrument të veçantë, tabelë që përmban të dhëna që lidhen me qëllimin e hulumtimit. Rezultatet e dala nga hulumtimi ofrojnë të dhëna për mundësitë, sfidat dhe praktikat e mësimdhënësve për zhvillimin e materialeve mësimore dhe përfshirjen e nxënësve në hartimin e tyre. Gjetjet e studimit tregojnë se mësimdhënësit nuk kanë kushte të mjaftueshme për përgatitjen e materialeve mësimore. Edhe pse mësimdhënësit përgatisin materiale mësimore, të cilat i përdorin gjatë punës me nxënësit në klasë, përfshirja e nxënësve në përgatitjen e materialeve është shumë e vogël. Edhe nxënësit, edhe mësimdhënësit materialet mësimore i përgatisin në shtëpi. Nxënësit materialet mësimore, si ilustrime, figura të ndryshme, prezantime, i përgatisin në kuadër të detyrave të shtëpisë dhe për përgatitjen e tyre shfrytëzojnë buxhetin dhe ndihmën e familjes. Gjetjet e hulumtimit argumentojnë mjaftueshëm nevojën e hartimit të moduleve të trajnimit për mësimdhënës, për përgatitjen dhe përdorimin e materialeve mësimore.