Klasat e bashkangjitura, mundësi integrimi apo segregimi për fëmijët me nevoja të veçanta

Abstrakti

Arsimi special në Kosovë daton që nga vitet e pesëdhjeta. Deri para pak vitesh, në të kanë qenë të përfshirë një numër i kufizuar i nxënësve, kryesisht në shkolla speciale në disa qendra të arsimit special dhe në gjashtë klasa të bashkangjitura sa ishin në Kosovë deri në vitin 2000. Pas luftës, reformimi i sistemit arsimor në Kosovë solli ndryshime pozitive edhe në arsimimin e fëmijëve me nevoja të veçanta. Duke pasur parasysh mungesën e ekspertëve dhe kuadrove të nevojshëm për arsim special, Ministria e Arsimit, Shkencës dhe Teknologjisë (MASHT) ka caktuar donatorë ndërkombëtar si agjenci drejtuese për projekte të lidhura me fusha të ndryshme të sistemit arsimor. Qeveria Finlandeze, përmes programit Përkrahja Finlandeze për Zhvillimin e Sektorit të Arsimit në Kosovë (FSDEK), e cila njihet me përvojën e saj nga kjo sferë e arsimit si ndër më pozitivet në botë, që nga viti 2000 ,është ndër mbështetëset kryesore të zhvillimit të arsimit special në Kosovë. Ndër shumë projekte të FSDEK-ut, të cilat i ka mbështetur edhe MASHT-i, ka qenë edhe hapja e klasave të bashkangjitura në shkolla të mësimit të rregullt në gjitha rajonet e Kosovës , me qëllim që të avancojë idenë e qasjes gjithëpërfshirëse. Kohët e fundit janë paraqitur dilema rreth asaj se klasat e bashkangjitura po i kontribuojnë më tepër integrimit apo segregimit të fëmijëve me nevoja të veçanta. Për ta verifikuar gjendjen, funksionimin, rolin, pozitën e nxënësve në këto klasa, FSDEK-u ka parë të nevojshme realizimin e një hulumtimi një hulumtim që do të pasqyronte të dhëna më se të rëndësishme për gjendjen aktuale në këto klasa. Për realizimin e këtij projekti hulumtues , FSDEK-u kontraktoi Institutin Pedagogjik të Kosovës ( IPK ), gjegjësisht Zyrës për Arsimin Special (ZAS ).