Tentativa për rimarrjen e Korçës (Puçi Grek i Korçës).

Abstrakti

Ngjarjet prag fillimit të Luftës së Parë Botërore e gjejnë Shqipërinë me një status juridik të përcaktuar nga Konferenca e Ambasadorëve në Londër, e cila u mbajt në vitet 1912-1913, por që vetëm në mars 1914, u bë e mundur ardhja e Princ Vidit në Durrës dhe formimin e qeverisë së re. Pavarësisht angazhimit të Fuqive të Mëdha të kohës, stabiliteti politik i Shqipërisë si dhe frenimi i oreksit të shteteve ballkanike, për të përfituar nga brishtësia e shtetit shqoiptar, do të rezultonin me vëhstirësi të shumta në zbatimin e vendimeve të Konferencës së Londrës. Punimi që po paraqesim, përpiqet të pasqyrojë situatën e Shqipërisë, pas ardhjes së Princ Vid-it nëShqipëri, vështirësitë me të cilat u paraqit qeverisja e tij si dhe tentativat e shteteve fqinje ballkanike, për të mos e lënë, Shqipërinë të mëkëmbet dhe gjithashtu për të përfituar territore në favor të tyre, si në rastin e Greqisë, të cilin po e paraqisim në këtë punim. Punimi synon që nën dritën e fakteve dëshmive të kohës, shtypit, etj, të nxjerr në pah situatën e vështirë në të cilën u ndodh popullata, mënyra e mbrojtjes së qytetit të Korçës dhe aktorët që u përfshinë në këtë ngjarje mjaft të rëndë. Gjatë punës kërkimore me qëllim krijimin e një panorame të qartë të ngjarjeve, problematikave që ajo solli, si dhe ndikimi që pati në jeten e vendit tonë janë përdorur metodat cilësore si dhe një hulumtimm grumbullues, përshkrues e analizues.