Rritja e bashkëpunimit rajonal në luftën kundër korrupsionit dhe pastrimit të parave dhe sfidat përkatëse

Abstract

Fenomeni i korrupsionit dhe pastrimit të parave është një ndër sfidat më të mëdha me të cilat përballen shoqëritë moderne në ditët e sotme. Ky fenonem përbën një kërcënim serioz për sigurinë dhe stabilitetin e kombeve por edhe më gjerë. Ai minon demokracinë, cënon sundimin e ligjit dhe pengon zhvillimin ekonomik e social të vendeve. Strukturat kriminale, në përpjekje për të forcuar pozitat e kanë shtrirë veprimtarinë e tyre në forma të shumëfishta. Në këtë kontekst, kërcënimet që shfaqen në kontekstin e gjerë shoqëror adresojnë nevojën për një bashkëpunim serioz dhe të strukturuar rajonal por edhe ndërkombëtar. Ky bashkëpunim lypset të zhvillohet në të gjitha nivelet, operacionale e politikëbërëse si dhe në të gjitha planet, teknologjike e njerëzore. Korrupsioni dhe qarkullimi i financave të paligjshme janë një veprimtari kriminale që nuk njohin kufij shtetërore dhe si të tilla kërkojnë veprim dhe kundërpërgjigje të përbashkët ndërkombëtare. Me qëllim trajtimin dhe adresimin e këtij fenomeni global është ndërmarrë realizimi i këtij punimi kërkimor. Analiza e paraqitur në këtë punim fokusohet tek natyra transnacionale e këtyre dukurive kriminale, format e sofistikuara të krimit, nevoja e bashkëpunimit ndërkombëtar dhe rajonal, iniciativat kryesore strategjike dhe ligjore të ndërmarra në këtë drejtim dhe qasjen rajonale që BE e partner të tjerë aplikojnë në vendet e rajonit tonë. Kuadri strategjik i miratuar për këtë qëllim dhe përpjekjet e vazhdueshme dhe të strukturuara për linjëzimin e tij me BE do të shërbejë si një platformë e përshtatshme e cila do të mundësojë veprime dhe iniciativa të tjera institucionale rajonale për të forcuar luftën kundër korrupsionit dhe financimeve të paligjshme. Metodologjia e përdorur për realizimin e punimit është një qasje krahasuese e burimeve dhe të dhënave zyrtare, raporteve të publikuara nga grupet e interesit dhe studimeve të realizuara në këtë fushë, duke përfshirë analiza rrisku, njëhsim të kuadrit strategjik, mekanizma bashkëpunimi, integrim sistemesh e shkëmbim informacioni dhe investime të përbashkëta. Gjetjet e punimit kërkimor tregojnë se mbështetja institucionale është mjet i domosdoshëm në luftën kundër krimit transnacional. Ndërtimi i një sistemi me rregulla, në të cilin institucionet janë funksionale dhe shërbimet janë efikase është një nevojë e menjëhershme në luftimin e këtyre fenomeneve kriminale. Nga ana tjetër luftimi i këtyre formave kriminale përbën një prioritet kyc për integrimin e vendeve të rajonit në Bashkimin Evropian.Nga të dhënat e grumbulluara dhe analiza e realizuar, punimi paraqet rekomandimet e nevojshme për frenimin e fenomenit të korrupsionit dhe pastrimit të parave.