Pjesëmarrja e Shqipërisë në skuadra të përbashkëta hetimore me agjencitë ligjzbatuese të Bashkimit europian

Abstract

Një emërues i përbashkët i Bashkimit Europian dhe shteteve të treta është vullneti për të luftuar kriminalitetin e rëndë, veçanërisht atë në formën e organizuar, i cili nuk njeh kufij shtetërorë. Krijimi dhe funksionimi i organeve ligjzbatuese të pavarura në nivel europian si EUROPOL, EUROJUST, FRONTEX, OLAF, dhe më rishtasi, Zyra e Prokurorit Publik Europian (EPPO), secili me rregulloren përkatëse, dëshmon për këtë qëllim të përbashkët, por nuk siguron, në vetvete, përfshirjen në këtë rrjet bashkëpunimi të shteteve kandidate për anëtarësim si Shqipëria, të cilës i burojnë nga MSAja detyrime bashkëpunimi në çështjet penale. Në pamundësi të zbatimit të drejtpërdrejtë të acquis përkatëse, qëllimi i këtij punimi është që të evidentojë kuadrin normativ që mundëson bashkëpunimin ndërkombëtar në çështjet penale, specifikisht në formën e ngritjes së skuadrave të përbashkëta hetimore, ndërmjet autoriteteve shqiptare dhe shteteve anëtare, me mbështetjen dhe pjesëmarrjen edhe të agjencive ligjzbatuese të BE-së. Nëpërmjet metodave cilësore, punimi analizon instrumentet kryesore të bashkëpunimit ndërmjet palëve dhe nivelin e zbatueshmërisë së tyre, duke paraqitur pozitën e autoriteteve shqiptare në operacione dhe kontributin e tyre real në veprimtarinë e përbashkët hetimore kundër krimit ndërkufitar, bazuar edhe në shembuj çështjesh konkrete. Në fund të analizës punimi arrin në përfundimin se, Republika e Shqipërisë, në sajë të marrëveshjeve të bashkëpunimit me këto agjenci, ka një rol dhe pozitë të barabartë si anëtar i skuadrave të përbashkëta hetimore njëlloj si çdo shtet anëtar i BE-së, duke shërbyer këto marrëveshje si një kuadër rregullator për këtë veprimtari deri në momentin e anëtarësimit të plotë.