Politikat përafruese të Abdylhamitit II karshi shqiptarëve

Abstrakti

Viset shqiptare për Perandorinë Osmane kishin një rëndësi të veçantë strategjike, e aq më shumë kur populli shqiptar qysh nga fillimet e sistemit osman ishte i integruar në të, duke u bërë edhe pjesë e administratës së saj. Kështu, shqiptarët i gjejmë nga pozitat më të ulëta e deri tek pozita më të larta, siç ishte ajo e sadriazamit. Madje sadriazamët nga familja e Kyprylynjëve të cilët udhëhoqën me Perandorinë gjatë gjysmës së dytë të shekullit XVII, respektivisht gjatë viteve 1656-1703, bëri që të rimëkëmbet Perandoria, dhe njëherit pjesa më e madhe e historianëve bashkëkohorë të periudhës osmane konsiderojnë se falë riorganizimit dhe reformave që bëri Mehmed Kypryliu dhe djali i tij Fazël Ahmed Kypryliu, mundi të mbijetojë.2 Krahas këtyre mund të përmenden edhe Mustafa Bej Koçi nga Korça3, i cili hartoi raportin e njohur vlerësues të sistemit osman, si dhe shumë figura të tjera që dhanë kontribute në forma të ndryshme.