Kongresi i Alfabetit të gjuhës Shqipe dhe vendi i tij në kulturën shqiptare

Abstract

Kanë kaluar 100 vjet që nga koha kur atdhetarët e shquar rilindës mbajtën në Manastir Kongresin e alfabetit, i cili i dha rrugëzgjidhje njërit prej problemeve më të vështira e më të rëndësishme të shoqërisë shqiptare, njësimit të alfabetit të gjuhës shqipe. Duke e vlerësuar këtë ngjarje nga largësia e një shekulli të tërë, mund të pohojmë, pa asnjë ngurrim, se vendimet e atij Kongresi për alfabetin e gjuhës shqipe do të mbeten përgjithmonë në historinë e kombit tonë si arritja më e madhe në jetën kulturore të shqiptarëve në shek. XX, me një ndikim të fuqishëm në zhvillimin e mëtejshëm të gjuhës e të kulturës së tyre. Me vendimet e Kongresit të Manastirit shqiptarët i treguan botës se tanimë ishin konsoliduar si një komb unik dhe se ushqenin një aspiratë të përbashkët, të hynin në rrugën e përparimit kulturor, shoqëror dhe ekonomik dhe të zinin vendin, që u takonte si popull europian në familjen e madhe të kombeve të qytetëruar të Europës.