Vlerat e studimeve etimologjike të Prof. Çabejt për shkencat albanologjike

Abstrakti

Qëkurse dijetarët e mesit të shekullit XIX përcaktuan me dorë të sigurt vendin e shqipes në familjen e gjuhëve indoeuropiane, etimologjia e shqipes nisi jetën e saj, duke u përfaqësuar nga shkencëtarët e mëdhenj të kësaj fushe, si: Franz Bopp, Gustav Meyer, Karl Brugmann, Holger Pedersen e duke vijuar me gjuhëtarë të specialiteteve të veçanta, si: Franz Miklosich, Norbert Jokl, Karl Treimer, Leo Spitzer, Carlo Tagliavini, Wilhelm Meyer-Lübke e shumë të tjerë, përmendja e të cilëve do të shkonte tepër gjatë. Por studimet e këtyre dijetarëve, të botuara në kohë të ndryshme dhe në gjuhë të huaja, mbetën të shpërndara në libra e revista, në biblioteka e institucione shkencore të vendeve të Europës. Ai që i mblodhi të gjitha këto për t’i sjellë në vendin e tij dhe për t’i çuar më tej studimet e kësaj fushe, është profesor Çabej, 100 vjetorin e të cilit kremtojmë sot.