Orientalisti i shquar Vexhi Buharaja

Abstrakti

Vexhi Buharaja ka lindur në në lagjen “Murat Çelepi” të Beratit, në 12 maj të vitit 1920. Buharaja rrjedh prej një familjeje me tradita atdhetare. Mësimet fillestare i kreu në vendlindje, në Berat. Pas kësaj vazhdoi studimet në Medresenë e Tiranës, ku u diplomua në vitin 1940 si një nga studentët më të dalluar. Menjëherë pas diplomimit, në moshën 20 vjeçare, u punësua në redaksinë e revistës së përmuajshme “Kultura Islame”, organ i Komunitetit Musliman Shqiptar në Tiranë. Vexhi Buharaja ka qenë atdhetar, dijetar, poet, përkthyes, shkrimtar, historian, studiues, hulumtues dhe njohës i dhjetë gjuhëve kryesore Lindore e Perëndimore. Në fillim të vitit 1944, Vexhi Buharaja u kthye në Berat, ku deri në vitin 1947 ka dhënë mësim nëpër shkollat e qytetit1.