SFIDAT E MUZEOLOGJISË SHQIPTARE DHE PRESPEKTIVA PËR TË ARDHMEN

Abstrakti

"Pak vende kanë shkollat e tyre të muzeologjisë dhe akoma më të pakta janë mundësitë, për të gjetur libra me të dhëna rreth ushtrimit të profesionit të muzeologut, ndërkohë që janë shkruar shumë artikuj për muzetë, por nuk ka libra rreth mësimit të profesionit. Problemi i kualifikimit të muzeologëve është parësor, prandaj specialistët me përvojë në këtë fushë e kanë për detyrë të mbështesin muzeologët e rinj, që kanë vendosur t’i përkushtohen punës në muze. Mendoj se ka ardhur momenti i përshtatshëm për të promovuar rrjetin muzeal në Shqipëri, që do të shërbejë si rregullator i gjithë sistemit të muzeologjisë shqiptare. Duke u nisur nga shqetësimet dhe problemet e kohëve të fundit, kemi krijuar bindjen se sistemi muzeor shqiptar, ka nevojë për një ristrukturim tërësor, prandaj domosdoshmëria e rrjetit muzealështë një zgjidhje juridike dhe praktike, duke u konsideruar edhe si një çështje e mirëfilltë shkencore. Botimi i revistës “Studime Muzeologjike”, do të jetë një pikësynim parësor. Gjithashtu do të ketë bashkëpunim të ngushtë me muzetë në rajon si ato të Kosovës, Maqedonisë së Veriut, Malit të Zi, Italisë,Greqisë, për të promovuar kulturën dhe muzealizimin e saj të . Organizimi i konferencave muzeologjike, do të ketë impakte pozitive në promovimin e rrjetit muzeal në Shqipëri, në rajon dhe më gjerë. Këto konferenca, do të shërbejnë në krijimin e një mjedisi të përshtatshëm, debatues dhe progresiv të muzeologjisë shqiptare. Referatet dhe kumtesat e konferencës do të përmblidhen në një botim, me qëllim që mesazhi i saj të përhapet në një qerthull më të gjerë edhe jashtë dyerve të sallës së konferencës. Me interes do të ishte një mbledhje vjetore e muzeologëve, e cila konsiston në shkëmbimin e përvojës nga të vjetrit tek brezi i ri. Fatmirësisht kemi muzeologë me përvojë dhe mjaft të përgatitur, të cilët po përpiqen të edukojnë më të rinjtë me ndjenjën e përgjegjësisë për profesionin e nderuar të muzeologut.Brezi i ri i muzeologëve po ndërgjegjësohet me pasionin për specialitetin që kanë zgjedhur. Muzeologët tanë kanë dhënë kontributin e tyre, duke botuar artikuj nëpër revista shkencore, duke referuar kumtesa nëpër simpoziume shkencore, duke debatuar në emisione televizive, si dhe duke shkruar monografi me tema historike dhe etnologjike. Sistemi muzeor është i lidhur me turizmin kulturor, prandaj duhet t’i përgjigjet kërkesave të kohës, në kushtet e globalizmit dhe të një shoqërie të hapur, prandaj synim parësor i rrjetit kombëtar të muzeve do të jetë ristrukturimi tërësor i sistemit muzeor shqiptar, si dhe çelja e muzeve të rinj me profil të veçantë.