Interneti - sfidë e shoqërisë bashkëkohore

Abstrakti

Sot, në kontekstin e relativizmit postmodern, njerëzit gjithnjë e më shumë në "realitetin virtual" të kompjuterit, d.m.th. internetit, po kërkojnë një kuptim të ri, një strehë të re, një shtyllë të re, një vendbanim të ri. Interneti bëhet jo vetëm një mjet komunikimi, por edhe një mjedis gjithëpërfshirës. Teknologjia e internetit ndikon në masë të madhe edhe në ndryshimin e mënyrës së jetesës. Revolucioni i fundit teknologjik në të cilin komunikojnë njerëzit, gjithnjë e më shumë tërheq vëmendjen e publikut të gjerë profesional dhe akademik. Mjetet bashkëkohore të komunikimit shoqëror, sidomos interneti, kontribuojnë në homogjenizimin social, kështu jo vetëm që modifikojnë mënyrën se si jetojmë, por ndikojnë edhe në ndryshimin e vetë thelbit të qenies “njeri” dhe të natyrës së tij. Nuk ka dyshim që interneti lehtëson shumë gjëra në jetën e përditshme, dhe ne si përdorues të tij duhet ta përdorim atë brenda suazave të mundësimit dhe lehtësimit, duke i respektuar kufijtë e lejueshmërisë, sepse çdo lloj teprimi, ekzagjerimi dhe përdorimi i paautorizuar tërheq kufizimin rigoroz dhe në fund të fundit edhe vetë ndalimin e përdorimit. Kështu, duke marrë parasysh të gjitha sa më sipër, qëllimi ynë është të nxjerrim në pah disa nga sfidat që shkakton internet si një formë e teknologjisë së avancuar moderne. Nga reflektimet e mundshme negative nga përdorimi i internetit mbi personalitetin e njeriut dhe shoqërinë në të cilën jetojmë, do të veçojmë: humbjen e kohës së çmuar; jo kontrollimin dhe jo vërtetimin e transmetimin e shpejtë të informacioneve dhe lajmeve, të cilat shpërndahen në mënyrë eksplozive përmes rrjeteve sociale dhe portaleve; reflektimin negativ nga (keq)përdorimi i internetit te fëmijët, familja dhe shoqëria në fushën e kodit moral dhe të sjelljes.