Metodat bashkëkohore për mësimdhënien e gjuhës dhe letërsisë shqipe në shkollat e Prishtinës

Abstrakti

Në këtë studim synojmë të paraqesim një pamje sa më tërësore sa i përket zbatimit të metodave bashkëkohore për mësimdhënien e lëndës së gjuhës dhe letërsisë shqipe në shkollat fillore dhe të mesme të qytetit të Prishtinës. Për shkak të korpusit të studimit, që mund të jetë shumë i gjerë, kemi vendosur që trajtimin tonë ta kufizojmë vetëm në shkollat fillore dhe të mesme të qytetit të Prishtinës Korpusi është ndërtuar mbi bazën e materialeve teorike si dhe mbi bazën e vrojtimeve dhe hetimeve që kemi bërë nëpër shkollat e Prishtinës si dhe nga intervistat që kemi realizuar me nxënës dhe mësimdhënës. Trajtimi i metodave bashkëkohore të mësimdhënies nga një prizëm serioz, shkencor dhe gjithëpërfshirës mendojmë që paraqet rëndësi të dorës së parë për sistemin arsimor në Kosovë në përgjithësi. Për realizimin e këtij studimi përveç konsultimit dhe shfrytëzimit të literaturës teorike nga fusha e metodologjisë së mësimdhënies, kemi realizuar edhe punë praktike, duke intervistuar mësimdhënës, nxënës dhe prindër. Kemi intervistuar: 20 mësimdhënës ( 10 nga cikli fillor dhe 10 të tjerë nga cikli i mesëm i shkollimit); 80 nxënës (50 nxënës të shkollave fillore dhe 30 të shkollave të mesme ) si dhe 26 prindër ( pra nga 2 prindër për secilën shkollë).