Disa koncepte rreth filozofisë islame

Abstract

Filozofia islame nga jomuslimanët, sidomos nga shumica e orientalistëve, është kontestuar dhe i është mohuar thelbi dhe brumi i saj filozofik. Këta e konsideronin filozofinë islame imitim të verbër të filozofisë greke, përkatësisht interpretim musliman të saj, duke mohuar kontributin burimor të filozofëve muslimanë.
Mirëpo, studimet serioze dhe të themelta të filozofisë dëshmojnë se filozofia islame është subjekt në vete, kategori e pashmangshme dhe e ndryshme nga filozofia greke. Ajo e gjeti filozofinë greke, huazoi çka mund të huazohej nga ajo, e mbindërtoi atë, shtoi tema të reja dhe metodologji të reja. Thjesht, ajo, filozofia islame, paraqet një tërësi solide, me karakteristikat e një filozofie të mirëfilltë.
Ndikimi i teksteve të shenjta, Kuranit dhe hadithit, në jetën e muslimanëve, nuk e ka penguar zhvillimin e filozofisë, por i ka dhënë fondament fetar, legjitimitet, duke e bërë filozofi autentike, që përfshinë hapësirën, kohën, metodën, temën.