Të jesh Imam në epokën digjitale

Abstract

Epoka Digjitale me risitë e saj që sjellë, paraqet sfida por edhe mundësi për njerëzimin. Krahas zhvillimeve me shpejtësi marramendëse, kemi përgjegjësinë që njerëzve t’i ofrojmë një model të frymëzuar nga mësimet islame. Ndryshimet dhe risitë që sjell Epoka Digjitale do të jenë pa dyshim edhe në qendër të vëmendjes të udhëheqësve fetarë ngase botëkuptimet fetare detyrimisht do duhen të predikohen duke marrë parasysh edhe gjeneratat e kësaj epoke që quhen gjenerata Z dhe gjenerata Alpha. Ndaj roli dhe domosdoshmëria për tu pajisur me njohuri aktuale dhe zgjerimi i diapazonit tek një imam paraqet domosdoshmëri në mënyrë që ti përgjigjen pyetjeve të kësaj epoke.

Bota sot është  shndërruar në një fshat global, kurse popujt në të, në një shoqëri të vetme multikulturore. E gjitha kjo, falë zhvillimeve teknologjike në sferën e transportit dhe të komunikimit.

Punimi është i nevojshëm fillimisht për nëpunësit fetar, pasi predikimi i mesazheve fetare nuk mund të bëhet pa marrë në konsideratë zhvillimet aktuale në teknologji dhe në botën virtuale. Ndryshimet në mentalitetin e njeriut të sotëm dhe ndryshimet në sferën e komunikimit na detyrojnë që hollësisht të shqyrtojmë rreth mënyrave të predikimit të fesë. Ruajtja dhe zhvillimi i anës shpirtërore ka qenë dhe do jetë ndër më aktualet për njeriun. Temat që sugjerohen të merren parasysh dhe të zhvillohen janë pikërisht ato që do jenë edhe më aktuale duke marr parasysh shpejtësinë e zhvillimeve në këtë epokë.