Pullat postare të Republikës së Kosovës

Abstract

Punimi paraqet përpjekje për një shkrim kërkimor nismëtar për pullat postare të Republikës së Kosovës. Andaj, këtu ofrohen përshkrime, citime ligjesh postare, tonat e të huajat, literaturë për krahasim, si të huajën, ashtu edhe literaturën shqipe, ndonjë teori për pullat postare për krahasim, mjaft fotografi të pullave postare e të tjera, vetëm e vetëm për të kuptuar sa më mirë problematikën e pullave tona postare. Pullat postare janë letra të disenjuara që kanë vlera dhe janë dëshmi që shërbejnë për pagesën e shërbimeve postare. Posta e Kosovës emeton emisione të pullave postare që nga viti 2000, fillimisht nën mbikëqyrjen dhe administrimin e UNMIK-ut, respektivisht nën mbikëqyrjen e Misionit të Përkohshëm Administrativ të Kombeve të Bashkuara në Kosovë. Pas shpalljes së pavarësisë më 2008, pullat postare emetohen nga Posta e Republikës së Kosovës, dhe sot vazhdon emetimi, po ashtu nga Posta e Republikës së Kosovës, por me emërtimin vetëm Kosovë. Pullat postare promovojnë vlerat e Kosovës, si ato historike, ashtu edhe vlerat e trashëgimisë natyrore, vlerat e trashëgimisë kulturore të fushave të ndryshme, vlerat kombëtare dhe emra të dalluar të fushave dispersive të shkencës, të artit, të sportit, pastaj vlerat në fushën ekonomike dhe shoqërore, vlerat artistike e vlera të tjera që janë identitet i shtetit të Kosovës. Me gjuhën globaliste do thosha se pullat postare kanë impakt te përdoruesi dhe më gjerë, qoftë ky informativ, qoftë mbresëlënës, i këndshëm dhe frymëzues ose qoftë thjesht vizual.