Analizë e programeve edukativo-arsimore për fëmijë në televizionet e kosovës (RTK , KTV, RTV21, KLAN KOSOVA)

Abstract

Studimi trajton rolin e televizioneve me frekuencë tokësore, RTK, KTV, RTV21 dhe televizionit kabllor KLAN Kosova, në edukimin e fëmijëve të ciklit fillor dhe të mesëm të ulët në Kosovë. Qëllimi i studimit është të identifikojë se deri në cilin nivel televizionet e ndihmojnë edukimin e nxënësve të arsimit fillor dhe të mesëm të ulët, përmes programeve me përmbajtje edukativo-arsimore, dhe a janë në harmoni me Ligjin e mediave dhe me Kornizën Kurrikulare të Kosovës. Studimit i paraprijnë dy pyetje kërkimore: 1) Deri në cilin nivel e ndihmojnë edukimin shkollor programet edukativo-arsimore në televizione (RTK, KTV, RTV21, KLAN Kosova)? 2.) A janë programet edukativo-arsimore të televizioneve në harmoni me Ligjin për Media dhe me Kornizën e Kurrikulës së Kosovës. Për të analizuar përmbajtjet e programeve edukativo-arsimore që janë në dispozicion për fëmijët, është bërë monitorim përgjatë 36 ditësh, në 24 orë transmetim. Rezultatet tregojnë se nuk ka dallime të mëdha ndërmjet televizionit publik dhe televizioneve private, sa i përket llojllojshmërisë së programeve dhe kohës transmetuese. Radio Televizioni i Kosovës ua kushton 3 orë e 44 minuta në javë apo ( 2,3% ) programeve edukativo-arsimore për fëmijë. Televizioni 21 ua kushton 3 orë e 30 minuta, ( 2,08 %), televizioni KTV nuk ka asnjë program edukativo-arsimor, që transmeton enkas për fëmijë, ndërsa Klan Kosova transmeton 2 orë e 20 minuta, apo 1,39%. Zakonisht programet janë në formë të kuizit - argëtimit dhe prezantimit të aktiviteteve të ndryshme shkollore, që janë në përputhshmëri me Kornizën Kurrikulare të Kosovës, mirëpo shumë pak ndihmojnë edukimin shkollor, ndërsa sa i përket Ligjit për RTK-në, ekzistojnë disa zbrazëtira në ligj, për arsye se nuk ka asnjë nen të veçantë që e përcakton sasinë javore të transmetimit të programeve edukativo-arsimore për fëmijë. Për këtë arsye, Ligji për RTK-në dhe Komisionin e Mediave duhet të obligojë televizionet që të transmetojnë programe edukativo-arsimore, si dhe të aplikojnë standarde të larta profesionale për cilësinë e programeve, pa asnjë përjashtim apo diskriminim të diverziteteve shoqërore dhe personave me nevoja të veçanta. Po ashtu, televizionet me frekuencë tokësore, qoftë publike apo private, të investojnë më shumë në prodhimin e programeve vendore për fëmijë me karakter edukativo- arsimor, sepse, duke iu dedikuar fëmijëve dhe shkollave, mediat mund të kontribuojnë shumë në ndërtimin e një sistemi edukimi pozitiv dhe efektiv në Kosovë.