Arsimi dual dhe mundësitë e zbatimit në shkollat profesionale në Kosovë

Abstrakti

Arsimi dual është një modalitet i AAP-së, i cili ofrohet në shkollat profesionale në shumicën e shteteve evropiane dhe është treguar mjaft i suksesshëm, në bazë të praktikave evropiane. Meqenëse deri më tani nuk është bërë ndonjë hulumtim për këtë problematikë, mendojmë se ky hulumtim do të ndihmojë dhe do të qartësojë nevojën e zbatimit të arsimit dual në Kosovë. Me këtë hulumtim synojmë të paraqesim rezultatet preliminare mbi mundësinë e implementimit të arsimit dual në Kosovë. Në fokus të hulumtimit, siç nënkuptohet edhe nga pyetjet e pyetësorit, ishte zbatimi i arsimit dual në Kosovë, sipas përgjigjeve të mësimdhënësve të shkollave të mesme profesionale dhe përfaqësuesve të bizneseve në Kosovë, duke përdorur metodologjinë kualitative dhe kuantitative, gjegjësisht nëpërmjet teknikave dhe instrumenteve, mbi të cilat mund të nxjerrim konkluzionet përfundimtare. Qëllimi i këtij hulumtimi është konstatimi i nivelit të mundësisë së zbatimit të arsimit dual në Kosovë. Për realizimin e këtij studimi janë përdorur disa metoda, si: Metoda e analizës teorike, Metoda e analizës së dokumentacionit, Metoda përshkruese, Metoda e krahasimit, si dhe Metoda statistikore. Rezultatet e nxjerra do të ndihmojnë MASHT-in dhe shkollat profesionale në Kosovë lidhur me mundësinë e implementimit të arsimit dual në Kosovë.