Çrregullimi i stresit post-traumatik tek fëmijët e abuzuar seksualisht

Abstrakti

Qëllimi i këtij studimi është të hulumtojë mbi çrregullimin e stresit post-traumatik tek fëmijët dhe adoleshentet e abuzuar seksualisht. Evidentimi i formave të shfaqjes së këtij çrregullimi tek fëmijët dhe mënyrat e trajtimit të tyre do të jenë në qendër të këtij studimi. Metoda e përdorur për të realizuar këtë studim do të jetë një shqyrtim i literaturës mbi çështjen në fjalë duke iu referuar revizionimit të artikujve që fokusohen tek kjo kategori moshore. Për këtë qëllim janë përzgjedhur vetëm artikuj që kanë në fokus fëmijët e abuzuar seksualisht të cilët janë trajtuar për çrregullim të stresit post-traumatik. Rezultatet e studimit përcaktojnë se të gjitha format e abuzimit mund të lënë pasoja tek fëmijët, madje stresi post-traumatik është gjuha me të cilën komunikojnë shqetësimin viktimat e tyre në formën më tipike. Abuzimi seksual si një ndër format e shumta të abuzimit është ndër më të rëndat dhe që shkakton pasoja të pakthyeshme tek një kategori fëmijësh. Në konkluzion mund të themi që stresi post- traumatik tek fëmijët e abuzuar seksualisht mund të shfaqet përmes formave më të agravuara të simptomave psikologjike dhe psikiatrike dhe madje për rikuperimin dhe rehabilitimin e fëmijës në disa raste trajtimi farmakologjik shihet si zgjidhja më e mirë për fëmijën.