Krimi ndërkufitar dhe bashkëpunimi rajonal i parandalimit të tij

Abstract

Nëpërmjet kësaj teme synojmë të përcillet tek lexuesi informacion mbi veprat penale që mund të kryhen nëpërmjet kufirit shtetëror, veçoritë e ndjekjes penale, zbulimit, parandalimit dhe ndëshkimit të autorëve, si dhe forcimit të bashkëpunimit rajonal për parandalimin e kësaj veprimtarie. Këto lloj krimesh janë të ndeshura me kohë në vendin tonë, kanë karakter ndërkombëtar dhe sjellin pasoja tepër të rënda për jetën e qytetarëve, stabilitetin, rendin dhe sigurinë kombëtare, por dekadën e fundit konstatohet shtimi i kësaj veprimtarie. Me interes për lexuesin do të jetë trajtimi i konceptit mbi menaxhimin e integruar të kufirit në Ballkanin Perëndimor, si dhe analiza juridike e veprave penale që lidhen me trafikimin e lëndëve narkotike dhe mjeteve motorike, falsifikimin e dokumenteve, kalimin e paligjshëm të kufirit, dhënien ndihmë për kalim të paligjshëm të kufirit, etj. Aspekti i analizës juridike të ligjit material do të trajtohet i lidhur ngushtë me veprimtarinë procedurale penale, si dhe detyrat që kryen Departamenti i Policisë së Kufirit dhe Migracionit për investigimin e kësaj veprimtarie. Gjithashtu, do të trajtohet bashkëpunimi i strukturave të policisë në planin dypalësh dhe rajonal për menaxhimin e integruar të kufijve shtetërorë, me synim krijimin e një koncepti më të qartë mbi shkëmbimin e informacionit kriminal, realizimin e operacioneve të përbashkëta, si dhe sekuestrimin e mjeteve që kanë shërbyer për realizimin e veprimtarisë kriminale. Bashkëpunimi ndërkufitar do të trajtohet i lidhur ngushtë me zhvillimin e teknologjisë dhe programet e përbashkëta që po realizohen me vendet fqinjë, kryesisht në vendkalimet kufitare për kontrollin e personave dhe të mjeteve. I gjithë procesi do të studiohet në planin e respektimit të të drejtave dhe lirive themelore të njeriut.