Procesi i çmuarjes së provave dhe krijimi i bindjes përtej çdo dyshimi të arsyeshëm

Abstract

Në procesin penal, organit të akuzës i kërkohet të provojë përtej çdo dyshimi të arsyeshëm, çdo element që përbën veprën penale, për të cilën akuzohet i pandehuri. Një sistem juridik i konsoliduar duhet të garantojë efektivisht këtë parim. Ky parim pasqyron vlerën e lartë shoqërore të sigurisë dhe lirisë personale në një shtet të së drejtës. Qëllimi i trajtimit të kësaj teme është pikërisht nxjerrja në pah e rëndësisë së këtij parimi si një nevojë për garantimin e një procesi të rregullt ligjor. Ky punim synon t’i japë një perceptim ndryshe konceptit “përtej çdo dyshimi të arsyeshëm” si dhe të analizojë kriteret kryesorë mbi të cilët bazohen gjykatat. Ky punim do të evidentojë qasjet teorike dhe krahasimore midis dy sistemeve kryesore juridike. Punimi ka si qëllim që t’u japë përgjigje një sërë pyetjesh siç janë: “Çfarë kuptojmë me konceptin “tej çdo dyshimi të arsyeshëm; Çfarë rëndësie ka një provë e vetme lidhur me provimin e fajësië së të pandehurit; Çfarë ndikimi kanë “indicjet” gjatë procesit të çmuarjes së provave dhe krijimit të bindjes së brendshme të gjyqtarit si dhe cilat të drejta kushtetuese implikon aplikimi i këtij parimi?” Duke marrë parasysh temën e punimit, është dashur fillimisht të identifikoheshin materialet specifike të fushës, që lidhen me akte ligjore, manuale apo komentare, bibliografi vendase dhe e huaj, konsultimi i burimeve elektronike dhe praktikave gjyqësore vendase dhe të huaja. Gjatë punimit janë përdorur metodologji të ndryshme studimore, si metodologjia e analizës së rasteve, e sintezës dhe metodologjia krahasuese.