Organizimi dhe veprimtaria e organizatës Nacional Demokratike Shqiptare në Anamoravë ( 1945-1947)

Abstract

Pasi u pushtua Kosova më 1945, u krijuan rrethana të reja në të cilat lindën dhe u formuan edhe organizata politike atdhetare që kishin për synim bashkimin e trojeve shqiptare. Një ndër organizatat më të njohur ishte Organizata Nacional Demokratike Shqiptare (ONDSH) e cila vepronte në Kosovë, Maqedoni dhe në vise të tjera shqiptare në ish- Jugosllavi. Nën presionin e fuqishëm politik të qarqeve serbe e jugosllave, çështja e Kosovës u tentua të mbyllej në mënyrë të panatyrshme dhe kështu të humbas karakterin e saj si një problem i mprehtë kombëtar e politik .Historia më e re e Kosovës Lindore, në veçanti e Anamoravës, si pjesë e historisë së popullit shqiptar në tërësi, ka kaluar periudha tejet të vështira. Andaj vlen për tu cekur se pas çlirimit nga fashizmi të Gjilanit dhe të Ferizajt me 16 e 17 nëntor të vitit 1944, fillon një etapë e re e zhvillimit të pakënaqësisë së popullit me pushtetin e ri “popullor”'. Nga kjo kohë, në këto vise filloi rezistenca e armatosur shqiptare kundër vendosjes së pushtetit të ri.