Promemorja e Eqrem Bej Vlorës e 29 korrikut 1912

Apstrakt

Në Arkivin Qendror të Shtetit Shqiptar (F-56, d.60) gjendet Promemoija e Eqrem bej Vlorës e cila i është dërguar sulltan Reshatit V në Stamboll më 29 korrik 1912. Ka mundësi që data të jetë shënuar sipas kalendarit julian, që do thotë se kjo do ta zhvendoste atë 13 ditë më vonë. Dokumenti në dorëshkrim, në gjuhën gjermane, ka 28 faqe me format 19x27,5 cm. Në faqen e parë nuk figuron titulli i dokumentit (Promemorie). Meqenëse në tekst përmendet termi promemoije, e kemi parë të arsyeshme ta emërtojmë si të tillë. Në mesin e dokumentit qëndron emri i kryeqytetit të Perandorisë dhe data e përmendur. Poshtë saj qëndron si titull fjala Shqëlqesi. Më pastaj, në kryeradhë fillon teksti i dokumentit. Dokumentin tjetër që autori e përmend në tekst "E vërteta për veprimin e xhonturqve në Shqipëri", të cilin thotë se ia bashkëngjiste promemories, nuk gjendet në dosjen e fondit të përmendur.