Roli i arkivit në mbrojtjen e lëndës arkivore

Abstrakti

Përmes këtij punimi paraqes një kontribut sado modest në shtjellimin e rolit tëarkivit për ruajtjen e thesarit burimor të shkruar. Siç dihet, arkivat janë institucione të rëndësisë së veçantë kujdesen për ruajtjen, mbrojtjen, sistemimin, pranimin, restaurimin dhe
publikimin (dhënien në shfrytëzim) të materialit arkivor për hulumtime shkencore, punë profesionale dhe nevoja të tjera në interes për shoqërinë, prandaj lëndët duhet të ruhen në vende adekuate dhe të sigurta, sipas standardeve bashkëkohore të arkivave.
Ky punim me theks të veçanet trajton rolin dhe rëndësinë qe duhet të ketë arkivi në ruajtjen, mbrojtjen dhe kujdesin ndaj lëndës arkivore, parimet e mbrojtjes se dokumenteve, depon e arkivit dhe sigurinë fizike, si dhe arkivin e Policisë së Kosovës si model, dhe ruajtjen e dokumenteve ne formën elektronike. Mbrojtja e lëndës arkivore ka qenë dhe mbetet problem i shoqërisë për qasje më proaktive ndaj arkivave. Për këtë duhet kuptuar rëndësia e arkivave, nevoja e krijimit të kushteve, hapësirës dhe mjeteve materiale për ruajtjen e lëndës arkivore. Arkivat në vendin tonë fatkeqësisht nuk posedojnë kushte të mira dhe lëndët arkivore ruhen në kushtet minimale, i ekspozohen faktorëve objektiv të dëmtimit të natyrave fizike, kimike, biologjike dhe mekanike. Parimet duhet mbështetur në politikat ligjdhënëse në aspektin e mbrojtjes së lëndës arkivore, përderisa krijuesit dhe poseduesit janë të obliguar që lëndën arkivore ta mbrojnë sipas akteve ligjore.