Edukimi i rinisë me normën e edukatës morale islame

Abstract

Puna arsimore dhe fetare në kuadër të programit të saj duhet gjithmonë të përmbajë idenë e vetme të vërtetë se njeriu është krijuar në të vërtetë për të njohur Krijuesin e tij, Zotin e Madhërishëm.
Zoti krijoi botën me të gjithë bukurinë dhe avantazhet e saj për njeriun, por, për fat të keq, në kontekstin e civilizimit dhe zhvillimit shoqëror, rinia po abuzon me "lirinë" e saj duke u marrë me lojëra, lakmi, zili dhe me vese, si: duhani, alkooli, drogërat, prostitucioni dhe lojërat e fatit, të cilat po e dëmtojnë shoqërinë.
Për të parandaluar këtë duhet bërë një ndërhyrje intelektuale dhe fetare, që t'u ofrojmë të rinjve një jetë të lehtë dhe të kontrolluar. Besimi do të jetë referenca e të gjitha aspekteve kulturore të arsimit islam. Ai e formon personalitetin e njeriut dhe e udhëheq drejt shpëtimit jo vetëm si individ, po edhe për formimin e marrëdhënieve në shoqëri. Përndryshe, të rinjtë po bëhen viktimë e tregtisë dhe prostitucionit. Familja po lëviz çdo ditë drejt shpërbërjes së saj për shkak të divorceve.
Për fat të keq, viktimat e këtyre problemeve shoqërore janë fëmijët. Këtu është vendi ku institucioni fetar duhet të ndërhyjë, me kornizën e tij të specializuar për të shpjeguar pasojat e këtij fenomeni dhe për ta parandaluar atë. I vetmi shërim është besimi në Zotin, që është barrikada mbrojtëse ndaj gjithë dukurive negative në shoqëri. Edukata morale islame do të forcojë logjikën e shëndoshë, e cila bën seleksionimin e gjërave të kota dhe pa vlerë në jetë.