Roli i medias në “pushtimin” që i bëhet natyrës

Abstrakti

Natyra është arti i Krijuesit dhe ne jemi pjesë e kësaj natyre. Por, ne po dalim gjithnjë e më tepër kundër natyrës dhe, për rrjedhojë, edhe kundër Krijuesit. Ne po denatyrohemi nga dëshira në rritje për pasuri dhe konsum. Paralelisht me denatyrimin e ndërgjegjes sonë po “i biem në qafë” edhe natyrës. Krijuesi e ka lejuar njeriun të përdorë të mirat e natyrës për të jetuar, por ne po i “heqim” pjesë natyrës për t’u pasuruar vetë. Zhvillimi i industrisë rëndon shpesh mbi natyrën duke e dëmtuar atë dhe duke krijuar një ekonomi jo të qëndrueshme. Po roli i medias, cili është në këtë luftë?! Media duhet të ishte në krah të qytetarit që rrjedhimisht dëmtohet nëse dëmtohet natyra, duhet të ishte avokati i kësaj shumice, duke detyruar politikëbërësit që të merrnin masa në mbrojtje të natyrës. Së paku, nëse nuk mund të bëjë avokatinë, media duhet të bëhet përcjellëse e së mirës.

Natyra dhe mjedisi gjenden të brishtë dhe të pambrojtur para dëshirës së njerëzve për të zhvilluar biznese dhe industri. Mjedisi nuk prodhon para, por është vetë një pasuri e madhe që shfrytëzohet me mënyra të ndryshme nga më shkatërrimtaret. Natyra është e pambrojtur siç duhet.

Demokracia në Shqipëri vazhdon të jetë mjaft e brishtë. Në këtë kontekst, publiku e gjen veten shpesh të përjashtuar nga vendimmarrja. Për çdo vendimmarrje me efekt në mjedis është vendosur si kusht kryerja e konsultimeve me publikun, ku përfshihen bizneset, komunitetet e vogla dhe deri tek ekspertët. Por a dëgjohet dhe përfshihet vërtet mendimi i tyre në vendimmarrje, apo këto konsultime bëhen sa për të qenë në dakordësi me ligjin?!

Media, më shumë se sa si mjet informimi për publikun, ka shërbyer si manipulatore e opinionit publik.  Shoqëria civile është e dobët para bizneseve që shfrytëzojnë asetet e natyrës, duke ndikuar edhe në vendimmarrjet politike.