Rreziqet e ekspozimit të nxënësve në rrjetet sociale nga shkollat

Abstract

Vitet e fundit është bërë trend publikimi në rrjetet sociale i aktiviteteve që realizohen në shkollë, duke shpërndarë foto/video të nxënësve, pa analizuar se si mund të ndikojë ky veprim në shëndetin psikik dhe në zhvillimin e mëvonshëm të tyre. Nuk janë të pakta rastet kur mësimdhënës dhe drejtorë të shkollave shpërndajnë fotot-imazhet e nxënësve në rrjetet sociale, për të promovuar aktivitetet e tyre shkollore. Për këto veprime është debatuar në komunitet, si veprim që mund të sjellë probleme të mëdha, duke rrezikuar privatësinë dhe sigurinë e nxënësve, si dhe duke dëmtuar ndjeshëm zhvillimin e mëtejshëm të tyre, që mund të lërë gjurmë të konsiderueshme edhe në fazat e mëvonshme të jetës. Qëllimi i studimit është të shqyrtojmë rreziqet që shkaktohen nga ekspozimi i nxënësve në rrjetet sociale nga shkollat. Qasja hulumtuese në këtë studim është e përzier (sasiore dhe cilësore). Mostra është e qëllimshme dhe përbëhet nga 125 mësimdhënës klasorë (1-5), 9 drejtorë dhe 5 psikologë nga komuna e Prishtinës, pra gjithsej 139 respondentë. Për mbledhjen e të dhënave është përdorur pyetësori me pyetje të mbyllura dhe me disa pyetje të hapura, të cilat na kanë mundësuar marrjen e të dhënave cilësore. Ndërsa me drejtorë dhe psikologë është përdorur intervista gjysmë e strukturuar. Për analizën e të dhënave të mbledhura nga pyetësori për mësimdhënës kemi përdorur programin SPSS, ndërsa për dokumentimin dhe analizën e të dhënave cilësore kemi përdorur protokollin e intervistës. Rezultatet e studimit tregojnë se rreziqet që mund të shkaktohen nga ekspozimi i nxënësve në rrjetet sociale nga shkollat janë: cenimi i privatësisë të nxënësve, pasiguria, efektet negative në mirëqenien psikologjike të fëmijëve, që mund të shfaqen në disa mënyra, si: ulje të vetëbesimit, viktima të bullizmit, ankth, depresion, brenga për pamjen fizike, për imazhin e trupit, probleme në shëndetin mendor, po ashtu edhe në aftësitë sociale. Shumica e mësimdhënësve rekomandojnë ndërprerje të këtij aktiviteti, për arsye se fëmijët po bullizohen kur po i shohin fotot e tyre nga njëri-tjetri dhe nga prindërit e tyre, ndërsa drejtorët e shkollave janë për të vazhduar, derisa shkollat të kenë uebfaqen e tyre. Përdorimi i rrjeteve sociale nga shkollat është një çështje shumë komplekse dhe kërkon që të diskutohet dhe të merren masa konkrete nga organet më kompetente, MAShT-i, DKA-të dhe të gjithë aktorët e tjerë të arsimit. Po ashtu, rekomandohet që të hartohet një rregullore e brendshme, apo udhëzim administrativ që rregullon mënyrën e përdorimit të rrjeteve sociale nga shkollat.