Mësimdhënia e letërsisë në edukimin e nxënësve në arsimin e mesëm të lartë në Kosovë

Abstract

Qëllimi kryesor i këtij studimi është të dalë në pah rëndësia thelbësore që ka lënda e Letërsisë, veçanërisht në shkollimin e mesëm të lartë, për shkak të moshës më të ndjeshme të nxënësve në edukimin dhe në formimin e përgjithshëm të tyre, në formimin e personalitetit të nxënësve dhe në të kuptuarit e rëndësisë së leximit edhe për formimin e tyre profesional. Pastaj, qëllime të tjera dhe objektiva, të cilat synohen të arrihen nëpërmjet kësaj lënde mësimore në këtë nivel shkollimi, janë edhe arritja e një kulture të qëndrueshme leximi te nxënësit, duke ua bërë me dije se leximi është “rruga mbretërore” për formimin e tyre intelektual, pavarësisht profesionit që do ta zgjedhin. Në përgatitjen e këtij studimi janë përdorur metoda të ndryshme, të kombinuara, të cilat kanë mundësuar arritjen e qëllimeve të parapara me këtë punim. Kam përdorur metodën e analizës teorike, metodën deskriptive, metodën krahasimtare, pastaj metodat induktive dhe deduktive, si dhe atë statistikore. Popullacion i këtij hulumtimi janë mësimdhënësit dhe nxënësit e shkollave të mesme të larta, nga disa rajone të Kosovës. Mostrën e përzgjedhur e përbëjnë 200 nxënës dhe 20 mësimdhënës të disa komunave të Kosovës. Në realizimin e hulumtimit janë përdorur pyetësorë për nxënës dhe intervistë e strukturuar për mësimdhënës të SHML-së. Duke e ditur rolin që ka letërsia në edukimin e nxënësve, edhe qasja e mësimdhënësve ndaj njësive të caktuara mësimore nga letërsia duhet të jetë e veçantë, në mënyrë që të dalin në pah mesazhe të fuqishme edukative dhe kulturore, që ndikojnë në formimin e përgjithshëm të nxënësve. Kështu që, krahas kërkesave që nxënësit të zhvillohen si personalitete, të mësojnë dhe të marrin pjesë aktive në shoqëri, është me rëndësi ta kuptojnë edhe rëndësinë e formimit të tyre shpirtëror e moral, si komponentë e domosdoshme për një personalitet të kompletuar.