Interesat e mësimdhënësve për rikualifikim në programin Avancimi i Kualifikimit të Mësimdhënësve

Abstract

Qëllimi i këtij punimi është të analizojë rolin e interesave në pjesmarrjen e mësimdhënësve në AKM nga aspekti i nxitjes për rikualifikim. Kualifikimi tani shihet si një domosdoshmëri për arsye se mësimdhënësve, sot, u duhet të marrin informacione dhe të përballen me sfidat e të ardhmes në vitet që pasojnë, andaj, ata duhet të planifikojnë kualifikimet që praktikisht të jenë të përballueshme për sa i përket kohës, vendit dhe mundësive financiare. Në këtë aspekt, interesat kanë një ndikim të madh që të motivojnë mësimdhënësit për kualifikim dhe rikualifikim, sepse në kushtet bashkëkohore, me anë të këtij veprimi hapen mundësistë për përfitimin e kualifikimit, i cili u mundëson mësimdhënësve të kenë një autonomi dhe një përgjegjësi më të madhe për kualifikimin e tyre. Interesat e mësimdhënësit për rikualifikim mund të përkufizohen si bashkëveprim i shumë aktiviteteve, me qëllim të përmirësimit të njohurive, shkathtësive, aftësive, me perspektivë personale, sociale dhe të orientuar në profesion, me modalitete arsimimi formale, joformale, me mjete gjithnjë e më të larmishme (tradicionale dhe të reja, elektronike) e në mjedise të ndryshme (arsimore, të punës, publike dhe shtëpiake), sipas nevojave e mundësive të vetë mësimdhënësve. Interesi është gjeneratori kryesor i nxitjes për kualifikim të mësimdhënësit, sepse sipas interesit ata edhe përzgjedhin rrugët dhe përmbajtjet e ndryshme për t’u arsimuar. Studimi i kësaj problematike, ka për qëllim konstatimin e nivelit të interesimit të mësimdhënësve të shkollave nëntëvjeçare për pjesëmarrje në AKM. Pyetja e hulumtimit është: Sa janë të interesuar mësimdhënësit e shkollave nëntëvjeçare që të rikualifikohen. Hipoteza themelore e hulumtimit është: Mësimdhënësit e shkollave nëntëvjeçare janë të interesuar për rikualifikim. Për realizimin e këtij studim kemi përdorur këto metoda: metodën e analizës teorike, metodën e analizës së dokumentacionit, metodën statistikore dhe atë të krahasimit. Popullacioni i këtij hulumtimi është 556 mësimdhënës që vazhdojnë studimet në programin AKM-së, ndërsa grupi përfaqësues është 226 mësimdhënës. Si instrument i hulumtimit është përdorur protokolli i anketës, dhe teknika e anketimit, në përbërje nga tri pjesë, me gjithsej 40 pyetje.