Testimi ndërkombëtar PIRLS 2021 – një analizë e arritshmërisë së nxënësve tanë në fushën e kulturës së leximit

Abstract

Ky punim paraqet një analizë të përgjithshme, bazuar në indikatorët e vlerësimit, të arritshmërisë së nxënësve tanë, të klasave të katërta, në testimin ndërkombëtar PIRLS 2021, i cili kishte fokus arritshmërinë e nxënësve në kulturën e leximit (reading literacy) dhe performancën e nxënësve të klasave të katërta të nivelit fillor në këtë fushë akademike. Punimi sjell informacione specifike të rëndësishme në lidhje me ndikimin e pandemisë COVID-19 në shkolla dhe në rezultatet e nxënësve të vendit tonë, por edhe të vendeve me të cilat e kemi bërë krahasimin. Meqenëse PIRLS është një testim në të cilin përfshihen nxënësit e shumë shteteve nga e tërë bota, në punim do të paraqiten arritjet tona bazuar në indikatorët matës të PIRLS dhe të krahasuara me arritshmërinë e vendeve të rajonit të Ballkanit Perëndimor, me fokus Shqipërinë, Maqedoninë e Veriut, Kroacinë dhe Slloveninë. Bazuar në arritshmërinë e nxënësve kosovarë, të krahasuar me arritshmërinë e përgjithshme në PIRLS 2021, por edhe të krahasuar me arritjen e vendeve fqinje. Krahasimi i të dhënave dhe analizimi i tyre kanë bërë që punimi të sjellë një numër përfundimesh, rekomandimesh dhe propozimesh që mund të jenë në shërbim të politikëbërësve të niveleve komunale dhe qendrore për ndërmarrjen e masave për përmirësimin dhe ngritjen në nivel ndërkombëtar të sistemit fillor arsimor.