Libër me vlera e shqyrtime të hollësishme për marrëdhëniet gjuhësore shqiptaro-serbe (Anila Omari, “Marrëdhëniet gjuhësore Shqiptaro-Serbe”, Qendra e Studimeve Albanologjike – Instituti i Gjuhësisë dhe i Letërsisë, Botimet Albanologjike, Tiranë, 2012, 420

Abstract

Anila Omari, bashkë me Xhelal Yllin, i përkasin një brezi gjuhëtarësh që erdhën në Institutin e Gjuhësisë e të Letërsisë në fillim të viteve ’80 dhe, ashtu sikundër pritej, së shpejti, do të dalloheshin nga brezi para tyre, së pari, për arsye të shfrytëzimit të mundësive të reja për formimin e përgjithshëm teorik e shkencor, duke ndjekur edhe shkollime pasuniversitare afatmesme e afatgjata në Austri, Gjermani etj., si dhe, ajo që ka më shumë rëndësi, për arsye të profilizimit të tyre të hershëm dhe të përkushtuar në fushat më gratçore të kërkimit të marrëdhënieve të shqipes me gjuhët fqinje të Ballkanit, ku do të kishim edhe hetimet e hulumtimet e kujdesshme në terren, kushtuar sllavizmave në leksikun dhe onomastikën shqiptare, duke bërë edhe një ndarje të arealeve: Xhelali në arealin juglindor d.m.th., të marrëdhënieve të shqipes me maqedonishten e bullgarishten, kurse Anila, për shumë vite radhazi, pa zhurmë e bujë, por me përkushtim e prurje të vlerësueshme e të rëndësishme, do t’u kushtohej raporteve të shqipes veriore me serbishten, duke ardhur, mbas disa artikujsh me peshë nga kjo fushë (si “Ndikime të gjuhës shqipe në të folmet jugore të serbishtes”, “Disa sllavizma të pavëna re në të folmet veriore të shqipes”, “Përsëri rreth huazimeve më të vjetra sllave në shqipe”, “Ndikimet sllave në “Mesharin” e Gjon Buzukut”) deri në librin e saj të rëndësishëm Marrëdhëniet gjuhësore shqiptaro-serbe, Qendra e Studimeve Albanologjike – Instituti i Gjuhësisë dhe i Letërsisë, Botimet Albanologjike, Tiranë, 2012, 420 f., një nga veprat e mëdha e të vlefshme, për të cilën, ndërkaq, edhe janë shprehur vlerësime e tumirime të kolegëve të saj.