Stambolli në “Sejahatnamenë” e Evlija (Evliya) Çelebiut

Abstrakti

Evlija Çelebiu, emri i vërtetë i të cilit është Dervish Mehmed Zilli ishte funksionar, udhëtar, intelektual dhe shkrimtar osman, i cili jetoi në shek. XVII. Ai mendohet të ketë lindur në vitin 1611 në qytetin e Stambollit dhe ka vdekur në vitin 1684.

 Për një periudhë rreth dyzet vjeçare ai ka shëtitur thuajse të gjithë hapësirën e Perandorisë Osmane, por edhe në shtete të tjera të Evropës, duke na dhënë informacione të rëndësishme mbi jetën sociale, shoqërinë, kulturën, gjuhën, traditat, historinë dhe fenë e shumë vendeve nëpër të cilat ka udhëtuar.

Ajo çka e habit studiuesin në lidhje me Çelebiun është diapazoni i tij i gjerë intelektual, po të kemi parasysh se në “Sejahatname” ai flet për çështje të cilat u përkasin fushave dhe shkencave të ndryshme, kulturës, fesë, arkitekturës, gastronomisë etj. Jo më kot, emri dhe vepra e tij u vlerësuan nga UNESCO duke e shpallur vitin 2011 si vitin e Evlija Çelebiut.