Enkeleida Kapia, Studime në gjuhësi teorike dhe gjuhësi të zbatuar, QSA, IGJL, Tiranë, 2015, 253 f.

Résumé

Përmbledhja “Studime në gjuhësi teorike dhe gjuhësi të zbatuar”, me autor prof. as. Enkeleida Kapia, përfshin një tufë studimesh nga fusha e psikolinguistikës, në të cilat trajtohen probleme të përvetësimit të gjuhës prej fëmijëve njëgjuhësh e dygjuhësh. Përmbledhja, me një vëllim prej 253 faqesh, ndahet në dy pjesë, në përputhje me tematikën e çështjeve të trajtuara. Në “Parathënie”, autorja shpjegon në një-dy paragrafë përmbajtjen e secilit prej artikujve, duke e mbyllur me falënderimet për profesorët që kanë kontribuar në formimin profesional të saj dhe për kolegët me të cilët ka bashkëpunuar. Libri mbyllet me një fjalorth shpjegues të termave e të koncepteve themelore dhe me treguesin e termave të përdorur.