Përndjekja e familjes Deralla nga tetova

Abstrakti

Kjo temë që po shtrohet për trajtesë konsiston me përndjekjen e familjes së patriotit dhe njërit nga ideologët e shpalljes së pavarësisë së Shqipërisë, Mehmet Pashë Derrallës. Edhe sot, derisa po shkruajmë mbi këtë temë, mbeten enigma disa çështje që kanë të bëjnë me këtë derë të madhe të shqiptarizmit, e cila i dha gjithçka shtetit të ri shqiptar, Republikës së Shqipërisë. Parashtrohet si hipotezë, pse familja Deralla u përzu në mënyrë brutale nga Tetova, kujt i pengonte një familje kaq e fuqishme dhe si u sekuestrua pasuria e plotë e tyre. Si përfundoi në burgjet jugosllave e sllavo-maqedonase njëri nga djemtë e Mehmet Pashë Derallës, Gajuri, si dhe saga e familjes Deralla deri në ikjen përfundimtare në Itali e më vonë në Amerikë. Pse pjesa e familjes së Halim Derallës u largua shumë kohë më herët drejt Tiranës, ndërsa familja e Hysen Derallës, me urdhër, u ngarkua në një kamion dhe në përcjellje të policisë sekrete jugosllave (OZNA) u përzu për në Shqipëri, duke e lënë të lirë në kufi me Shqipërinë. Të gjitha këto do të jenë objekt i studimit tim mbi përndjekjen që iu bë familjes së Mehmet Pashë Derallës.