Halim Deralla, personalitet i shquar i lëvizjes autonomiste Shqiptare

Abstrakti

Padyshim që historia e një kombi, është historia e familjeve të mëdha të këtij kombi. Familjet e mëdha shqiptare kanë qenë në çdo kohë barrikadat e para ndaj çdo rrebeshi, të paepura në stoicizmin e tyre, ato kanë pritur e janë përballur me hordhi armiqsh gjithfarësh, duke mbrojtur njëherazi nderin e tyre dhe kombin. Padyshim, në vargun e këtyre familjeve të mëdha, dera e Derallëve zë vendin e saj të merituar në historinë shqiptare të shekullit të kaluar. Ndër pinjollët e kësaj dere, Mehmet Pashë Deralla do të linte grada dhe ndere të ofruara nga Porta e Lartë, duke u vënë plotësisht në shërbim të Shqipërisë, në radhët e para të kalorësve që kërkonin pavarësinë e trojeve etnike arbërore. Këtë shqiptarizëm të kulluar, ministri i luftës i të parit shtet shqiptar (1912) do ta përcillte, pos të tjerave, edhe tek djemtë e tij, Halimi, Gajuri, Hyseni etj.