Prof. Dr. Gëzim Rredhi (1960-2022)

Abstract

Gëzim Rredhi ka lindur më 07.01.1960 në fshatin Arrëz e Vogël të Tepelenës. Mësimet e para i mori në vendlindje e më pas vijoi në shkollën e mesme pedagogjike “Pandeli Sotiri” në Gjirokastër. Studimet e larta i kreu për Gjuhë dhe letërsi shqipe në Universitetin “Luigj Gurakuqi” në Shkodër në vitin 1982. Më pas punoi me përkushtim në disa sektorë të kulturës dhe arsimit në rrethin e Tepelenës si inspektor për kulturën, drejtor i shkollës së mesme të bashkuar në Maricaj, Inspektor në kabinetin pedagogjik e më pas inspektor në drejtorinë arsimore. Në vitin 1994 fillon angazhimin si pedagog me kohë të plotë në Departamentin e Letërsisë, Fakulteti i Edukimit dhe Shkencave Shoqërore, në Universitetin “Eqrem Çabej”, Gjirokastër. Studimet pasuniversitare i kreu pranë Fakultetit Histori dhe Filologji, Departamenti i Letërsisë, në Universitetin e Tiranës gjatë viteve 2001- 2003. Në vitin 2005 merr gradën shkencore “Doktor i shkencave në Letërsi” me temën “ Proza e Alberto Moravias mes psikoanalizës dhe neorealizmit”. Në vitin 2011 merr titullin “Profesor i asociuar” dhe në vitin 2015 titullin “Profesor”, duke plotësuar kështu profilin e tij si pedagog dhe studiues.