Botimi dhe studimi i veprës së gjeniut

Noli në Kosovë

Abstract

Objekt i këtij studimi janë bërë arritjet e gjertanishme të kërkimeve noliane në Kosovë. Shënimi i 50-vjetorit të vdekjes së tij na obligoi që të merremi më gjerësisht me vazhdimin e kërkimeve të veprës dhe të bëmave të tij të shumta dhe me ndikim në jetën e popullit shqiptar; t’i kthehemi studimit sistematik të veprës së tij nga studiues të dijeve, të metodave të ndryshme dhe të qasjeve të shumta në periudha të caktuara; si dhe të reflektojmë në disa nga vlerësimet e gjertanishme për të në shkencën shqiptare, duke i parë ato edhe në kontekstin krahasues. Arsyet e kësaj qasjeje u nxitën prej synimit që në plan të parë të sjellim një pamje të plotë të botimit të veprës së tij në Kosovë dhe të qasjes nga studiuesit e këtushëm, si dhe të bëjmë një tipologji të studimeve të botuara nga fillimet e deri më sot për të; prej informatave a indicieve për praninë edhe të disa studimeve të panjohura deri më tash; prej botimit jo të plotë, jo sistematik dhe jo filologjik e tekstologjik të veprës së tij, të njohur më parë dhe asaj të mbetur në dorëshkrim etj. Pra, që vepra e Nolit, përgjithësisht, të shihet me tërë përbërësit e saj hapësinorë dhe kronologjikë, të gjitha gjetjet e gjertanishme: botimet, studimet dhe tekstet e tjera do të trajtohen në kontekstin kohor dhe tipologjizues.