Popullsia e kazave Dibër e Epërme dhe Dibër e Poshtme në regjistrat osmanë (1845 - 1858)

Abstrakti

Pas prezantimit të një historie të shkurtër të këtyre regjistrimeve të bëra gjatë shekujve, ky punim shqyrton demografinë e zonës së Dibrës nga Periudha e reformës së Tanzimatit (1839) deri në vitin 1858, periudhë në të cilën Dibra ishte një pjesë administrative e sanxhakut të Ohrit të Vilajetit të Rumelisë dhe ndahej në Kazanë e Dibrës së Sipërme dhe në Kazanë e Dibrës së Poshtme.

Gjithashtu në bazë të këtyre regjistrave është analizuar struktura demografike dhe faktorët ndikues në këtë strukture, ku nëpërmjet të dhënave të këtyre regjistrave bëhet e mundur pasqyra nga numri i përgjithshëm i shtëpive, numri i popullsisë dhe klasifikimi i kësaj popullate në kategori sipas moshës ose pasurisë.

Gjatë analizës, këto të dhëna i kemi llogaritur në përqindje, duke mundësuar krahasimin e demografisë së viteve të marra në studim.

Sa i përket zonës së marrë në studim, mund të thuhet që nuk ka ndodhur regjistrimi i vitit 1831. Regjitrime të popullsisë së kësaj zone në funksion të realizimit të reformave të Tanzimatit, i përkasin periudhës kohore midis viteve 1845-1858, ku Dibra kishte statusin e kazasë dhe administrativisht bënte pjesë në Sanxhakun e Ohrit të Vilajetit të Rumelisë. Në këto deftere Dibra ishte e ndarë në Kazanë e Dibrës së Sipërme dhe në Kazanë e Dibrës së Poshtme.