Studimet etimologjike në fushë të shqipes nga Gustav Meyer-i te Eqrem Çabej

Abstract

Në horizontin e studimeve albanologjike në përgjithësi, të gjuhës shqipe dhe të etimologjisë së saj në veçanti G. Meyer-i dhe E. Çabej shfaqen si dy maja të larta që zotëruan këtë fushë studimesh, i pari në gjysmën e dytë të shekullit XIX, i dyti në gjysmën e dytë të shekullit XX. E. Çabej vetë e quajti G. Meyer-in si më të madhin albanist të kohës së tij dhe njërin nga më të mëdhenjtë e të gjitha kohërave, krahas Holger Pedersenit e Norbert Joklit që vijuan më tej pas tij studimin e historisë së gjuhës shqipe.