Periodizimi i fondeve dhe koleksioneve personale në arkivat e Kosovës

Abstract

Zhvillimi i ngjarjeve historike, politike ushtarake, shkencore krijuese, artistike gjatë një etape të caktuar kohore nxjerr personalitete të dalluara, në nivel shtetëror dhe kombëtar. Këto personalitete lënë pas vetes një trashëgimi të rëndësishme në formën e materialeve dokumentuese, të cilat me kalimin e kohës marrin rëndësinë e një fondi arkivor personal që është me rëndësi për arkivistikën dhe studiuesit e fushave të ndryshme. Sikurse lënda arkivore publike, po ashtu edhe fondet dhe koleksionet personale
arkivore bëjnë pjesë në kategorinë e asaj që ne e cilësojmë si memorie e një shteti, përkatësisht e një populli ose shoqërie. Një burim ose mënyrë e pasurimit të fondit të përgjithshëm shtetëror pa dyshim që është edhe grumbullimi i dokumenteve me pronësi private. Arkivat e Kosovës, përveç se ruajnë një numër të konsiderueshëm të këtyre fondeve dhe koleksioneve, vazhdojnë të pasurohen më këto lloj dokumentesh. Për të pasur një qasje më të lehtë hulumtuesit për qëllime shkencore në këto fonde dhe koleksione, si dhe të interesuarit e tjerë, rëndësia e periodizimit të tyre bëhet gjithnjë më e nevojshme dhe e domosdoshme. Prandaj, kumtesa jonë synon të shpjegojë dhe të analizojë pikërisht periodizimin e fondeve dhe koleksioneve arkivore në arkivat e Kosovës.