Fondi arkivor në fushën e mbrojtjes - trashëgimi kombëtare e vyer për mendimin politiko-ushtarak Shqiptar.

Abstract

Përgjatë këtij çerek shekulli sistem demokratik në Shqipëri janë shkruar vlerësime dhe janë bërë analiza në fushën e mbrojtjes, veçanërisht për periudhën e sistemit totalitar 1945-1990. Në shumë prej tyre vërehen qëndrime të skajshme, mbivlerësime apo nënvleftësime jo thjesht të lidhur me vetë formimin e autorëve, por edhe për faktin se një pjesë e konsiderueshme e dokumenteve të fushës së mbrojtjes janë ende informacion i klasifikuar “sekret shtetëror”, gjë e cila nuk i mundëson gjithkujt të njihet me këto dokumente arkivore. Kjo padyshim pengon njohjen e gjithë spektrit të mendimit politiko-ushtarak shqiptar në periudhën e Luftës së Ftohtë, dhe lë shteg për vlerësime subjektive për elemente të veçanta të sistemit të mbrojtjes dhe historisë ushtarake të vendit tonë, siç janë rastet i hiperbolizimit të shifrave për sasinë së armatimit, qendrave të zjarrit apo kostove financiare për mbrojtjen në Shqipëri në periudhën 1945-1990. Për t’u dhënë studiuesve një ide të përgjithshme rreth fondit arkivor në fushën e mbrojtjes hedhim disa vlerësime për trashëgiminë arkivore në fushën e mbrojtjes që ruhet e administrohet në Arkivin Qendror të Forcave të Armatosura.