Hadumod Bußmann, “Lexikon der sprachwissenschaft” (fjalor i gjuhësisë).

Botimi i katërt, i kontrolluar dhe i plotësuar me të dhëna bibliografike në bashkëpunim me Hartmut Lauffer. Shtëpia Botuese “Alfred Kröner”, Shtutgart 2008

Abstract

“Fjalori i gjuhësisë” nga H. Bußmann është një vepër tashmë klasike në hapësirën gjermanishtfolëse për konceptet bazë që lidhen me shkencën e gjuhësisë. Ai i drejtohet një publiku të gjerë dhe synon të plotësojë jo vetëm nevojat imediate të studiuesve, por edhe të studentëve dhe të interesuarve të tjerë. Siç informon botuesja në parathënie, dhjetëvjeçarët e fundit tregu është pasuruar me një numër të konsiderueshëm manualesh, fjalorësh dhe enciklopedish, në gjuhën angleze dhe gjermane, të cilët përmbajnë shpjegime të hollësishme, por kanë edhe çmim të lartë. Duke shtuar se këto vepra voluminoze mund të gjenden e konsultohen pothuajse vetëm nëpër biblioteka, botuesja e sheh vlerën e veçantë të veprës së saj në faktin që ajo me përmasat, vetëm një vëllim, dhe çmimin që ka mund t‘i shërbejë një publiku shumë të gjerë, çka është e vërtetë, sepse kjo vepër përdoret gjerësisht si nga specialistët ashtu dhe nga studentët e persona të tjerë.