Jorgji Gjinari për metodologjinë e studimit të dallimeve dialektore në fushën e morfologjisë

Abstract

Të vlerësosh studiuesin Jorgji Gjinari si gjuhëtar nuk është e lehtë, sepse veprimtaria e tij kërkimore-shkencore e botuese është e pasur, e larmishme për nga tematika e problematika që trajton dhe, mbi të gjitha, me mjaft kontribute. Nën drejtimin e tij u hodhën bazat e dialektologjisë shqiptare si shkencë, një veprimtari shkencore e organizuar, që nisi me krijimin e sektorit të dialektologjisë, me krijimin e kartotekës dhe të fonotekës dialektore, e duke vijuar më tej, nën drejtimin e tij, me hartimin e skicave e monografive për të folmet e shqipes, për dukuri dialektore fillimisht të pjesshme e të shkëputura nga sfera të ndryshme të gjuhës e më pas për veçoritë e të folmeve për të gjitha sferat e gjuhës. Po ashtu nën drejtimin e Gjinarit u bënë edhe studime përgjithësuese për dukuri të veçanta dialektore ose për grupe të folmesh e për të gjitha të folmet të marra së bashku. Përveçse një organizator i talentuar si drejtues i departamentit të dialektologjisë, Gjinari është autor i një vargu monografish për të folme të ndryshme të shqipes, autor i veprës Dialektet e gjuhës shqipe (Tiranë, 1989), e cila është vepra më e plotë e përgjithësuese mbi dialektologjinë e gjuhës së sotme shqipe. Po ashtu, ai është bashkautor dhe drejtues i veprës madhore Atlasi dialektologjik i gjuhës shqipe (Napoli, 2007). Nuk mungojnë kontributet e tij edhe në fusha të tjera të albanologjisë, si dialektologji historike, prejardhja e gjuhës shqipe, gjuhë letrare etj.