Për poezinë e Mitrush Kutelit

Abstract

Sa herë është folur e shkruar për Mitrush Kutelin dhe veprën e tij letrare, vëmendja është përqendruar, mbi të gjitha, në vlerat e spikatura të prozës së tij dhe, në mënyrë të veçantë, të prozës së tij të shkurtër me rrëfenjat e rrëfimet e papërsëritshme. Shumë pak është synuar nga studiuesit tanë të bëjnë një vlerësim të krijimtarisë poetike të këtij autori. Natyrisht, pa e vënë aspak në dyshim se vlerat më të qenësishme të veprës së Mitrush Kutelit i përkasin prozës së shkurtër, duhet njëkohësisht të pranojmë se këto vlera në formën e tyre më të plotë evidentohen duke i pranëvënë me veprën letrare në tërësi të këtij autori, e cila është shumë më e gjerë dhe më komplekse. Në të, krahas rrëfimeve e rrëfenjave, gjejmë dhe mjaft shkrime të arrira publicistike, krijime për fëmijë, prozë të gjatë, përkthime dhe poezi.