Një monografi e Joachim Matzinger-it: Joachim Matzinger, Die sekundären nominalen Wortbildungsmuster im Altalbanischen bei Gjon Buzuku. Ein Beitrag zur altalbanischen Lexikographie, Albanische Forschungen Band 38, Harrasowitz Verlag, Wiesbaden, 2016.

Résumé

Para disa muajsh, studimet buzukiane, si dhe ato për leksikun historik të shqipes, u pasuruan me një monografi të re e të thelluar të albanologut austriak Joachim Matzinger rreth mënyrave dhe mjeteve të formimit të emrave e mbiemrave në dokumentet më të hershme të shqipes së shkruar. Duke qenë e para vepër e shtypur në gjuhën shqipe që njohim deri më sot, Meshari i dom Gjon Buzukut ka qenë objekt studimi dhe burim parësor të dhënash për çdo gjuhëtar që merret me historinë e kësaj gjuhe. Dhe kjo është e kuptueshme, po të kujtojmë se kemi të bëjmë me një vepër të vëllimshme, pjesërisht ose tërësisht përkthim prej tekstesh të tjera ende të papërcaktuara, me një gjuhë të pasur dhe strukturë komplekse. Kështu, gjuha shqipe, megjithëse e dokumentuar vonë, na shfaqet që në fillim me një monument të madh gjuhësor që na lejon të studiojmë gjerësisht aspekte të ndryshme të saj dhe të nxjerrim konkluzione të bazuara.