Shkodifikimi i mitit të murimit në urë në një roman të Kadaresë

Abstract

“Ura me tri harqe” u botua si pjesë përbërëse e trilogjisë me të njëjtin titull. Dy veprat e tjera ishin: “Pashallëqet e mëdha” dhe “Muzgu i perëndive të stepës” (1978). Sipas vetë shkrimtarit, kjo përzgjedhje për t’i botuar këto tri proza në të njëjtin vëllim, ishte një rastësi që i jepte një karakter spontan trilogjisë, dhe nuk linte mundësi për lexime krahasuese. Megjithatë, sipas studiuesit M. Mandalà, në parathënien që i bën kësaj vepre në botimin e veprave përmbledhëse të Kadaresë nga shtëpia botuese “Onufri” në vitin 2008, kjo zgjedhje nuk mund të jetë një rastësi: “Nuk mund të jetë i rastit rrjeti i dendur i marrëdhënieve ndërtekstore që i jep triologjisë një karakter unitar, një arkitekturë sistematike, pra, një impiant tekstor organik dhe të organizuar. Në fakt, pikërisht falë këtyre elementeve të përbashkëta tekstore, lexuesi mund të vlerësojë triologjinë si pjesë përbërëse e një sistemi, me anë të së cilit, autori synonte të tejkalonte përpjekjen që bëri me “Breznitë e Hankonatëve”.