Një botim me vlera shkencore “Sintaksa e fjalisë”, sprovë monografike e Tefë Topallit, Shkodër, 2011, 744 f.

Résumé

Vitin që shkoi, qarkulloi libri i suksesshëm dhe me vlera shkencore i prof. as. dr. Tefë Topallit, Gramatikë e gjuhës shqipe, “Sintaksa e fjalisë”, sprovë monografike, botim i Institutit të Studimeve Albanologjike pranë Universitetit të Shkodrës “Luigj Gurakuqi”. Është autor i mjaft botimeve dhe shkrimeve të botuara në shtypin shkencor dhe periodik dhe tashti merret ekskluzivisht me sintaksën e shqipes në rrafshin sinkronik. Tefë Topalli është titullar i lëndës “Sintaksa e gjuhës shqipe” në Universitetin e Shkodrës, por jep leksione për këtë disiplinë edhe në Universitetin e Tiranës dhe në Fakultetin e mësuesisë në Universitetin e Podgoricës. Me këtë vepër Tefë Topalli përfshihet në gjuhëtarët seriozë të studimit të sintaksës shqipe. Kjo monografi është trajtesa më gjerë e bërë deri tashti në vendin tonë për sintaksën e fjalisë në krahasim me autorët që janë marrë me tekste mësimore ose me studime të pjesshme nga kjo disiplinë.